उत्तम दिशादर्शक - वाँडर वूमन … कर्तबगार महिलांना शाप असतो अस्वस्थतेचा आंतरिक कोलाहलाचा. त्यांचे एक मन सतत कामाचा विचार करत असते, तर दुसरे सतत आपण नक्की कोण आहोत? आपली भूमिका, आपले महत्त्व, आपली किंमत घरात किती आहे या प्रश्नांवर झगडत असते. ‘वाँडर वून’ या मार्शिया रेनॉल्डस, लिखित व सुमती बोरसे यांनी त्यांच्या केलेल्या ‘नाविन्याच्या शोधात!’ या अनुवादात, लेखिकेने अनेक सत्ये उदाहरणे देऊन अशा अशांत स्त्रियांच्या आशा-आकांक्षा-इच्छा-प्रेरणा उद्देश यांचा शोध घेण्याचा प्रयत्न केला आहे. व्यक्तिमत्व विकास असे आपण ज्याला म्हणतो ते सर्व कार्यक्रम त्यात सामावलेले आहेत. हा ‘स्व’चा शोध काही सोपे काम नाही. अनेक आयामांतून या प्रश्नाकडे लेखिकेने पाहिले आहे. अनेक कर्तबगार स्त्रियांच्या मुलाखती, हकिकतीतून मिळवलेले हे ज्ञान उच्चपदस्थ पुरुषांसाठी, कंपन्यांच्या सीईओंसाठी अर्थपूर्ण व अत्यंत उपयोगी असे आहे. कॉर्पोरेट जगताच्या पार्श्वभूमीवर केलेल्या या लिखाणात प्रशिक्षणतंत्र, मानसिक स्वाध्याय यांची रेलचेल आहे. कर्तबगार स्त्रियांसोबत काम करणाऱ्यांनी, कायम अतृप्त असणाऱ्यांसाठी आपली ऊर्जा मार्गी लावू इच्छिणाऱ्यांसाठी हे पुस्तक एक उत्तम मार्गदर्शक ठरेल. यातील संशोधने सखोल व प्रामाणिक आहे. कुठेही उपदेशाचा आव आणला असे नाही, परंतु प्रत्येक कहाणी, अनुभवाचा, इच्छेच्या अंती एक-एक बोध दिला गेला आहे. कामाला सुरुवात करण्यापूर्वी सर्वांकडेच भव्यदिव्य स्वप्न व इच्छा असतात. वास्तवाशी सामना होताच पदरी अनेकदा केवळ निराशाच येते. परंतु स्वत:कडेच भिन्न दृष्टिकोनातून बघता यावे, म्हणून केलेली मदत असे या पुस्तकाचे स्वरूप आहे. तुम्हाला काहीतरी शिकवणे हा या पुस्तकाचा उद्देश नसून, तुमच्यात आमूलाग्र परिवर्तन घडवून आणणे हा खरा हेतू त्यामागे आहे. आयुष्यात जे शिकलात त्यांची अंमलबजावणी कशी करायची. आयुष्यातील काळोख्या कालखंडातून बाहेर कसे पडायचे. संधीच्या खिडकीचा उपयोग कसा करायचा. बरोबर मार्गाची निवड कशी करायची... अशा सर्व प्रश्नांची यथा योग्य उत्तरे सोदाहरण इथे मिळतील. महिलांवर लिहिलेले हे पुस्तक फक्त महिलांकरताच मात्र नाही. अनेक उच्चपदस्थ महिलांची फौज आपल्या उद्योगात बाळगणाऱ्या सर्व पुरुषांनी देखील हे पुस्तक जरूर वाचावे असा लेखिकेचा आग्रह आहे. त्यामुळे पुरुषांना मर्मदृष्टी मिळेल असेही ती म्हणते. ...Read more