पुस्तक परिचयाच्या माझ्या याआधीच्या सत्रात मी डॅन ब्राऊनच्याच एंजल्स अँड डेमन्स या पुस्तकाचा परिचय दिला होता. त्यांनी लिहिलेली पुस्तकं खूप आवडतात मला. म्हणून या सत्रातही त्यांचंच ओरिजिन नावाचं पुस्तक घ्यावं वाटलं. ही पुस्तकं वाचत वाचत जेव्हा पानं पलटल जातात तेव्हा पुस्तकातली गोष्ट खरी वाटायला लागते. पात्र जिवंत होतात आणि आपल्या आसपास संवाद सुरु आहेत असं वाटायला लागतं. आपण इतके त्या गोष्टीत गुंगले जातो. अशा गोष्टी वाचायला कोणाला आवडणार नाहीत? आणि विषय तर इतके भन्नाट, कल्पनाही करु शकणार नाही असे असतात. त्या कादंबरीतून खूप माहितीही मिळते म्हणजे इतिहासाबद्दल असेल किंवा टेक्नॉलॉजीबद्दल असेल, सायन्सबद्दल असेल… ती सगळी माहिती, गोष्टीतील इतर उल्लेख जसे की, ठिकाणं, धार्मिक संस्था, कला, स्थापत्य या गोष्टी खऱ्या असतात. त्यांच्या आधारे एक काल्पनिक गोष्ट लिहिण्यात डॅन ब्राऊन यांचा हातखंडा आहे. त्यांची पुस्तकं चित्तथरारक असतात, पुढं काय होईल याची उत्कंठा वाढवणारी असतात बरोबरीने बौद्धिक आव्हानं ही त्यात असतात. ओरिजिन ची गोष्टही अशीच गुंतागुंतीची आणि उत्कंठावर्धक. माणसाची उत्क्रांती आणि माणसाचे भविष्य यासंबंधी एडमंड कर्षने काही शोध लावलेला असतो. अतिशय गुप्ततेने केलेलं काम आता सर्वांपुढे आणायची वेळ झालेली असते म्हणून त्याचं प्रात्यक्षिक कर्ष गुगेनहाईम वस्तुसंग्रहालयात दाखवणार असतो. पण कार्यक्रमापूर्वी थोडा वेळ आधीच कार्यक्रमाच्या ठिकाणीच त्याची हत्या होते. हत्या करुन हल्लेखोर अर्थातच पळून जातो. मग कर्ष चं हे काम जगापुढे आणण्यासाठी प्रोफेसर रॉबर्ट लँग्डन आणि त्या वस्तू संग्रहालयाची मुख्य अँब्रा व्हिडाल कामाला लागतात. ही अँब्रा स्पेनच्या भावी राजाची होणारी वधू असते. पण त्यासाठी त्यांना कर्षचा महासंगणक, त्याचा पासवर्ड आणि मुख्य म्हणजे त्या महासंगणकाची जागा शोधण्यापासून सुरुवात करायची असते. याच्याबरोबरीने घडणाऱ्या घटना यात एकामागोमाग एक, जलद गतीने समोर येत राहतात. कमी वेळात बरंच काही घडणारी गोष्ट असं म्हणता येईल. गोष्टीची सुरुवात होते ती कर्ष आणि स्पेनमधील बडं प्रस्थ..कॅटालोनिया इथल्या अति प्राचीन मॉनेस्ट्रीमधील बिशप अँटोनियो वाल्डेस्पिनो यांच्या भेटीने. कर्ष हा गेम थिअरी आणि कम्प्युटर मॉडेलिंगमधला तज्ञ. सनातन कॅथॉलिक मूल्य जपणारा एकजण, त्याचे दोन साथीदार आणि एक निरीश्वरवादी कर्ष...सगळ्यात आधी त्या तिघांना आपण लावलेला शोध सांगण्यासाठी, दाखवण्यासाठी कर्ष त्यांना भेटतो. आपला शोध ऐकून ही मंडळी आणि नंतर जगही हादरेल ही खात्री त्याला असते. एक महिन्याने या शोधाचे प्रात्यक्षिक जगापुढे सादर करणार असं तो त्यांना सांगतो, पण प्रत्यक्षात या भेटीनंतर तीनच दिवसात तो ते जगासमोर मांडणार असतो. गुगेनहाईम वस्तुसंग्रहालयात हे प्रात्यक्षिक होणार असते आणि त्यासाठी जगभरातून काही निवडक लोकांना आमंत्रण दिलेले असते, ज्यात त्याचे पूर्वीचे गुरु रॉबर्ट लँग्डनलाही आमंत्रण असते. आमंत्रण निवडक लोकांना असले तरी परिषदेचे थेट प्रक्षेपण टीव्ही आणि इंटरनेटवर होणार असते. त्यामुळं सगळं जग त्यावर डोळे लावून बसलेलं असतं. पण प्रात्यक्षिक सादर करण्यापूर्वीच तिथेच कर्ष ची हत्या होते, ज्यामुळे लँग्डन आणि अँब्रा यांना धक्का बसतो. इथूनच दोघांची शोधमोहीम सुरु होते आणि त्यांना कर्षने बनवलेला विन्स्टन नावाचा महासंगणक मदत करतो. रॉबर्ट तो शोध जाहीर करण्याचे प्रयत्न करतोय कळल्यावर कर्षच्या हल्लेखोराला रॉबर्टचीही हत्या करण्याची सूचना दिली जाते. मुळात विन्स्टन आहे आणि तो कुठे आहे हेच माहीत नसतं. त्यामुळं शहरातल्या वेगवेगळ्या ऐतिहासिक इमारतींमधून घेत चाललेला विन्स्टनचा शोध, मग त्याचा ४२ आकडी पासवर्डचा शोध असे टप्पे पार पाडत ते त्यांच्या उद्दिष्टापर्यंत पोहोचतात. या दोन टोकांमधल्या सगळ्या थरारक, उत्कंठावर्धक घटना ओरिजिन या कादंबरीत वाचायला मिळतात. कर्षची हत्या कोण आणि कशी करतो, विन्स्टनची बुद्धिमत्ता, राजपुत्राची भावी वधू म्हणून अँब्राची परिस्थिती, त्यांच्यातील समज-गैरसमज आणि कर्षचा शोध याबद्दल जाणून घ्यायचं असेल तर पुस्तक वाचायला हवं. डॅन ब्राऊन त्यांच्या कथेत येणारी ठिकाणं, वेगवेगळ्या इमारती, इतर गोष्टी यांचं अगदी बारकाईने आणि सविस्तर वर्णन करतात. त्यांच्याबरोबर आपण त्या त्या ठिकाणी भेट देत आहोत असेच वाटून जाते. ओरिजिनची कथा बार्सिलोना आणि आसपास घडतेय. गुगेनहाईम वस्तुसंग्रहालयातील कलाकृतींचं खूप छान वर्णन यात आलं आहे. इतर ठिकाणांची माहिती, वर्णन असं येतं की गोष्ट खरी घडतेय वाटायला त्यामुळं मदत होते. त्यामुळेच डॅन ब्राऊन यांची पुस्तकं वाचून संपली तरी मनात रुंजी घालत राहतात. ...Read more

मागील काही कालखंडात डॅन ब्राऊन हे नाव सर्व वाचन प्रेमींच्या मुखात अगदी सातत्याने आळवल जात आहे, याचं कारण म्हणजे त्यांनी मागील दशकात साहित्य क्षेत्रात केलेली क्रांती. विस्तृत, आकर्षक, तर्कशुद्ध युक्तिवाद आणि सतत प्रश्न विचारत राहणारी लेखणी ही त्यांची मेची बाजू. मग ते “द लॉस्ट सिम्बॉल”, “द दा विन्सि कोड", "इन्फर्नो" असोत वा “अँजेल अँड डेमोंस” वा "ओरिजिन” त्यांच्या लेखणीने सर्वांना निखळ आनंदच दिला आहे. संपूर्ण जगाने त्यांची दखल घेतली याचं श्रेय सर्वस्वी त्यांचच आहे. प्राण पणाला लावून ते लिहतात, हे आपल्याला लगेच समजून येतं. विषयाचा अगदी गाढा आणि सखोल अभ्यास, लहान सहान गोष्टींची माहिती आणि काळजीपूर्वक वर्णन, आणि पात्रांच्या माध्यमातून ते उभा केलेलं भावविश्व. हे सारेच वाखाणण्याजोग आहे. त्यांच्या लिखाणाचे खरे वैशिष्टय आणि गंमत म्हणजे रहस्य, वास्तव आणि पात्रांची अनिश्चितता या साऱ्याने, त्यांनी गुंफलेली कथा. त्याला तंतोतंत जुळणारे पुरावे. आणि सतत पुढे काय होईल याची एक सुखद चिंता. या साऱ्या मोहपाशात आपण अडकतो आणि अधिकाधिक आतुर होऊन वाचू लागतो. ओरिजिन हे पुस्तक देखील त्याला अपवाद नाही. त्यांनी सगळीकडेच रंगवलेल्या रॉबर्ट लँग्डन याचीच ही कथा आहे.ज्यामध्ये आपल्या मानवजातीची सुरवात कोठून झाली आणि ती आता कुठे जात आहे, याचा एडमंड या त्यांच्या तरुण, तडफदार, हुशार, जिज्ञासू अशा विद्यार्थ्याने लावलेला शोध किंवा मांडलेला सिद्धांत पाहण्यासाठी जातात. आणि तिथे झालेल्या काही रोचक घटनांवर आधारित हे पुस्तक आहे. संपूर्ण पुस्तक फक्त एका रात्रीची रोमहर्षक कथा आहे , हे तुम्हाला समजल्यावर हैराण व्हाल. आणि तरीही लेखकाने अतिशय सुरेख सगळे बारकावे जपले आहेत आणि कथा रचली आहे. “आपण कोठून आलोत ?? आणि कुठे जात आहोत ??” मानवजातीसाठी असलेला हा सगळ्यात मोठा प्रश्न लेखक सोडवतो. पुस्तकाचा कालखंड आत्ताचाच असल्यामुळे आपण त्याच्याशी अगदी मिळून मिसळून जातो. यामध्ये संगणक, आर्टिफिशियल इंटेलिजन्स यांचाही प्रामुख्याने समावेश आहे. जे आपल्याला अजूनच भारावून टाकेल. फक्त पोकळ विचारांचा डोलारा नसून, भविष्यावर अगदी सूचक भाष्य करणारे हे पुस्तक आहे. अनेक उल्लेख आणि त्यामागील उद्देश, हेतू आणि कारणे तुमच्या मनात घर करून जातील. मला स्वतःला त्यातील “ गॉड ऑफ गॅप्स ” ही संकल्पना खूपच आवडली आहे. नक्की वाचव असे हे पुस्तक. साय-फाय आणि थरारक कहाणी, तुम्हाला भावेल. उत्सुकता शिगेला नेऊन त्याची उकल केल्यामुळे पुस्तक वाचताना मजा येते. अनेक वळणं घेत पुस्तक कसे परत मुळ पदावर येते हे पाहून, नक्कीच यावर भविष्यात चित्रपट होईल यात शंकाच नाही. आपण कोठून आलो आणि कुठे जातोय यावरचे उत्तर हवे असेल तर नक्की वाचा ... #ओरिजिन. स्रोत: insidemarathibooks.in पुस्तक समीक्षा : अक्षय सतीश गुधाटे ...Read more