मेजर जनरल इयान कारडोझो यांचा जन्म मुंबईत झाला. सेंट झेवियर कॉलेजमधून शिक्षण पूर्ण केल्यानंतर, जुलै १९५४ मध्ये ते क्लेमेंट टाउन, डेहरादून येथे जॉइंट सर्व्हिसेस विंगमध्ये सामील झाले. पुढे १९५५ मध्ये पुण्याच्या नॅशनल डिफेन्स अकॅडमी मध्ये त्याचे रूपांतर झाले. इथे ते सर्वोत्तम कामगिरीसाठी सुवर्णपदक प्राप्त करणारे पहिले कॅडेट ठरले तर, मेरीटमध्ये प्रथम आल्याबद्दल त्यांना रौप्य पदका ने गौरविण्यात आले. पुढे ते भारतीय सैन्य अकादमीमध्ये, पाचव्या गोरखा रायफल्स (फ्रंटीयर फोर्स) मध्ये लेफ्टनंट म्हणून भरती झाले. इथेही ते सेना पदक प्राप्त करणारे पहिले अधिकारी ठरले. १९७१ मध्ये बांगलादेशातील सिल्हेट येथे झालेल्या युद्धात ते जखमी झाले. स्वत:च्या गंभीर जखमांची पर्वा न करता त्यांनी स्वत: आपला पाय कुकरी ने कापला आणि त्यानंतर आलेल्या अपंगत्वावर मात करून भारतीय लष्करात, घोडदळ पलटण सांभाळण्यासाठी नियुक्त झालेले ते पहिले अपंग अधिकारी ठरले. त्यांनी पुढील सेवा कृत्रिम पाय वापरून सुरु ठेवली. १९९३ मध्ये ते चीफ ऑफ अ स्टाफ या पदावरून निवृत्त झाले. २००९ ते २०१४ पर्यंत ते भारतीय पुनर्वसन परिषदेचे अध्यक्ष होते. सध्या ते सामाजिक कार्यकर्ते, लेखक म्हणून कार्य करत आहेत तसेच द स्पास्टीक्स सोसायटी ऑफ नॉर्दर्न इंडियाच्या सोबत अपंग क्षेत्रातही कार्यरत आहेत.