बांधा सडपातळ राखण्यासाठी तोंडावर ताबा ठेवण्याचा सल्ला नेहमीच दिला जातो. पण आजूबाजूला चमचमीत पदार्थ हात जोडून उभे असताना त्यांचा अपमान तरी कसा करायचा, असा प्रश्न आज अनेकांना पडतो. डाएट म्हणजे बिनसाखरेचे, बिनतेलाचे, बिनमैद्याचे, बिनमिठाचे, थोडक्यात अतिय सपक पदार्थच डोळ्यांसमोर उभे राहतात आणि मग सुडौल राहण्याचा विचार मागे पडतो. बॉलीवूड स्टार्सना आहाराचे धडे देणाऱ्या पूजा मखिजा यांनी ‘इट डिलिट’ या पुस्तकाचा सुनीति काणे यांनी अनुवाद केला आहे. झटपट वजन घटवण्याचं जे वेड सध्या सर्वत्र पसरलेलं दिसतं, त्यापसून दूर राहण्याचा सल्ला लेखिकेने दिला आहे. या वेडामुळे चिडचिड, अशक्तपणा, केस-त्वचेशी संबंधित तक्रारी, स्नायूंचा ऱ्हास अशा समस्या उदभवू शकतात, अशी धोक्याची घंटाही यात वाजवण्यात आली आहे. एवढा सगळा उपदव्याप केल्यानंतर वजन पुन्हा पूर्वपदावर आले, तर सगळे मुसळ केरात जाण्याची भीतीही यात व्यक्त करण्यात आली आहे. अन्न म्हणे आपल्या समस्या सोडवण्याचा मार्ग असे मानून बटाट्याचे वेफर्स खात किंवा चॉकलेट चघळत चर्च करणेही योग्य नाही आणि अन्नामुळे वजन वाढते, असे मानून त्याला आपला शत्रू समजणेही चुकीचेच हे लक्षात आणून देण्याचा प्रयत्न करण्यात आला आहे. आपल्या भावनांचा आपल्या खाण्याच्या इच्छेशी काही संबंध आहे का, वजन घटवण्याची आपली खरोखरच मानसिक तयारी आहे का, बारीक होण्यासाठी कोणी तुमच्यावर दबाव आणत आहे का, असे प्रश्न स्वत:लाच विचारण्याचा सल्ला यात देण्यात आला आहे. वजन कसं आणि कधी करावं, प्रगती कशी तपासावी, सकारात्मक कसं राहावं, याच्या टिप्सही यात मिळतील. ...Read more

सडपातळ राहण्यासाठी खाणं कमी केलं पाहिजे, आवडीच्या पदार्थांचा त्याग केला पाहिजे, असा अनेकांचा समज असतो. पण ही खवय्येगिरी सांभाळूनही सडपातळ कसं राहता येऊ शकतं, हे पूजा मखिजा यांनी सांगितलं आहे. त्यांच्या ‘इट-डिलिट’ या पुस्तकाचा अनुवाद सुनीती काणे यांनीकेला आहे. अन्न हा मित्र की ‘शत्रू’, स्वत:च्या आहाराला कसं पडताळून बघायचं, मनाचा निग्रह कसा करायचा, मानसिकता कशी बदलायची अशा अगदी मूलभूत गोष्टींची चर्चा त्यांनी केली आहे. ‘आहाराबाबतच्या जुन्या सवयींना रामराम ठोका’, ‘हालचाल करा आणि वजन उतरवा’, ‘खा’, ‘जीवनशैलीला मुरड घाला’ असे कानमंत्र सांगत त्यांनी त्याच्यामागचं तत्त्वही समजावून सांगितलं आहे. सहज पटतील अशी उदाहरणं आणि सहजसाध्य गोष्टी यांच्यामुळे कुणालाही पुस्तकातल्या सल्ल्यांचा उपयोग होईल. ...Read more

सुदृढ आयुष्याचा गुरुमंत्र ... माणूस हा सवयींचा गुलाम असतो. सवय एकदा लागली की ती बदलणे दिवसेंदिवस कठीण होत जाते. आहाराच्या चुकीच्या सवयी तुमच्या आरोग्याचे मोठे नुकसान करू शकतात. जगात जितके लोक उपाशी राहिल्याने मरतात त्यापेक्षा खूप जास्त लोक खाण्या्या चुकीच्या पद्धतींमुळे मरतात. आहाराच्या या चुकीच्या सवयींना नियंत्रणात ठेऊन आरोग्य सुधारण्याचा मंत्र पूजा मखिजा या पुस्तकात देतात. पूजा मखिजा यांच्या ‘इट डिलिट’ या पुस्तकाचा मेहता पब्लिशिंग हाऊसने ‘सुडौल रहा’ नावाने अनुवाद प्रसिद्ध केला आहे. या पुस्तकामुळे मखिजा यांचा आरोग्य मंत्र मराठी वाचकांना अनुभवता येणार आहे. आहाराच्या सवयींबाबत तारतम्य बाळगणं म्हणजे तारेवरची कसरत. त्यात सामान्य माणसाला आहार घटकांची पुरेशी माहिती नसते. हे सामान्य ज्ञान सोप्या, सहज भाषेतून या पुस्तकाच्या माध्यमातून वाचकांपर्यंत पोचतं. प्रथिने, कर्बोदकं आणि इतर आहार घटक, ते उपलब्ध असणारे पदार्थ आणि त्यांचा दैनंदिन आहारातील समावेश, या सर्व गोष्टींची शास्त्रोक्त माहिती या पुस्तकातून समोर येते. पुजा मखिजा यांची सांगण्याची रीत या पुस्तकाची जमेची बाजू. माणसाच्या आहाराच्या सवयींविषयी बोलताना त्या अनेक गमंतीशीर संदर्भ देतात. या आहाराच्या सवयींना त्या माकडाची उपमा देतात. त्या म्हणतात, माकडासारखा आहार- म्हणजे एक खूळ संपलं की दुसरं खूळ डोक्यात घेणारा आहार. अकाई बेरीजपासून अ‍ॅपल सायडर व्हिनिगरकडे धाव घेणारा आहार. कोणतीही नवी, चकचकीत, आकर्षक गोष्ट पाहिली की, माकड त्यावर झडप घालतं, त्यातला काही भाग टाकून देतं आणि फक्त आवडीचा तेवढाच खातं, तसा हा आहार असतो. `मंकी डाएट` तुम्हाला `नव्या` अन्नपदार्थाबद्दल अर्धी कच्ची माहिती देतं आणि त्याचे फायदे अवास्तव वाढवून सांगतं. अशा डाएटमध्ये एकाच अन्नघटकाचा अतिरेक असतो. मखिजा यांचा सोप्या भाषेतला मंत्र सुनिती काणे यांनीही नेमक्या भाषेत अनुवादित केला आहे. आहारविषयक शास्त्रीय संकल्पनाही सहज शैलीत स्पष्ट करण्यात आल्या आहेत. त्यामुळे हे पुस्तक खऱ्या अर्थाने सदृढ आयुष्याचा गुरुमंत्र ठरु शकते. ...Read more