मुलांच्या सर्वांगीण विकासामध्ये शिक्षण आणि संस्कार यांचा वाटा मोठा असतो. त्यादृष्टीने शिक्षक आणि पालक यांची भूमिका महत्त्वाची ठरते. नव्या शतकाची नवी आव्हाने मुलांसमोर पंख फैलावून उभी आहेत. त्या आव्हानांना स्पर्श करण्याचा आत्मविश्वास मुलांना शिक्षक आि पालकांनी दिला पाहिजे. सध्याच्या स्पर्धेच्या युगामध्ये अभ्यास व परीक्षेचा ताण पालक, मुले दोघेही अनुभवत असतात. हा ताण कमी करण्यासाठी व अभ्यासाच्या काही सोप्या व रंजक पद्धती जाणून घेण्यासाठी हे पुस्तक नक्कीच मदत करू शकेल. तसेच मुलांचा आत्मविश्वास वाढविण्यासाठी हे पुस्तक मार्गदर्शक ठरायला हरकत नाही. ...Read more

सुजाण पालकत्वाचा डोलारा... ‘सुजाण पालकत्व’ या शब्दाचा आवाका मोठा असला, तरी या पुस्तकात तो मुलांचा अभ्यास, गृहपाठ आणि उजाळणी यापुरता मर्यादित राखण्यात आला आहे. या सर्वांविषयी पालकांचा दृष्टिकोन कसा असावा, हे नेमकेपणाने सांगण्यात हे पुस्तक कमालीचे यशसवी ठरते. मुलांच्या सर्वांगीण विकासामध्ये शिक्षण आणि संस्कार यांचा महत्त्वाचा वाटा असल्यानेच शिक्षक आणि पालक यांची भूमिका मोलाची कशी ठरते, याचा अदमास घेण्याचा प्रयत्न सुजाण पालकत्व या पुस्तकात करण्यात आला आहे. एकविसाव्या शतकात, स्पर्धेच्या युगात समोर उभ्या ठाकलेल्या आव्हांनाना आत्मविश्वासाने सामोरे जाण्याचा विश्वास मुलांना कसा देता येईल, याचा ऊहापोहही पुस्तकात करण्यात आला आहे. विद्यार्थी तसेच पालकांचाही अभ्यास व परीक्षेचा ताण कमी करण्यासाठी या पुस्तकात सोप्या व रंजक पद्धती दिल्या आहेत. मुलांचा सर्वांगीण विकास होण्यासाठी घर आणि शाळा यांचे नाते परस्परांना पूरक होण्याची आवश्यकताही लेखिकेने नेमकेपणाने मांडली आहे. शिक्षक-पालक संबंध निकोप असण्यावर मुलाच्या प्रगतीचा आलेख कसा अवलंबून असतो, हेही या पुस्तकात कथन करण्यात आले आहे. या पुस्तकात गृहपाठ, गृहपाठाचा उत्तम दर्जा, विविध विषयांसाठी गृहपाठ, चाचणी व परीक्षेसाठी तयारी, परीक्षेला सामोरे जाताना, विविध पातळ्यांवर शिक्षक-पालक नाते, मुलांचा आत्मविश्वास जोपासण्यासाठी... अशा विविध लेखांद्वारे मुलाच्या सर्वांगीण विकासासाठी महत्त्वपूर्ण ठरणाऱ्या पायऱ्या कशा पादाक्रांत करता येईल, याचे एक साधेसोपे समीकरण मांडण्यात आले आहे. ...Read more

संवाद आई-बाबांशी... पालकत्वाची न टाळता येणारी आणखी एक जबाबदारी म्हणजे मुलाचा गृहपाठ आणि परीक्षेचा अभ्यास. हेच घटक आईबाबा आणि मुलांमधल्या संघर्षाचा विषय होतात. तसे होऊ नये, म्हणून काय करता येईल, याचा सल्ला या पुस्तकात आहे. संघर्षाच्या सार्वत्रिक मुदद्यांवर भर देत अशा परिस्थितीत कोणते उपाय करावेत, हे टिप्सच्या स्वरूपात सुचविण्यांत आले आहे. त्यामुळे कोणतेही पान काढून केव्हाही, कुठेही नजरेखालून घालता येते. कोणत्याही समस्येवर सुचविण्यात आलेले उपाय हाताशी असणाऱ्या साधनांद्वारे करता येतील, असे आहेत. ...Read more

‘पालकत्व’ या संकल्पनेची व्याप्ती खूपच मोठी आहे. पालकांचे कर्तव्य व जबाबदाऱ्या याबद्दल लिहावे, सांगावे तेवढे थोडेच, याची मीना टाकळकर यांना पूर्ण जाणीव असल्याने ‘सुजाण पालकत्व’ या पुस्तकाच्या पहिल्याच पानावर ‘गृहपाठ व परीक्षा यांमध्ये मदत करताना...’ हापुस्तकाचा विषय असल्याचे स्पष्ट केले आहे. बहुसंख्य पालक आपल्या पालकत्वाचे यश हे मुलांच्या ‘मार्का’मध्ये मोजतात. अशा पालकांच्या प्रयत्नांना दिशा देऊन त्यामध्ये नेमकेपणा आणण्याचा प्रयत्न लेखिकेने येथे यशस्वीपणे केलेला आहे. सर्वच विषयांचा गृहपाठ कसा करावा, त्याचा दर्जा उच्चतम कसा राखावा, परीक्षेपूर्वी व परीक्षा देताना कोणती काळजी घ्यावी, शिक्षण-परीक्षा-यश याबद्दलचा मुलांचा दृष्टिकोन विकसित करून त्यांच्यात आत्मविश्वास कसा निर्माण करावा, अशा महत्त्वाच्या विषयांबद्दलची परिपूर्ण माहिती पुस्तकातून दिली आहे. मुलांच्या सर्वांगीण प्रगतीकरता शिक्षक-पालक यांच्यातील संपर्क व त्याचे जवळचे नाते कसे महत्त्वाचे आहे, त्याबद्दलची जाणीव त्यांनी दोन्ही घटकांना करून दिली आहे. मुलांची मानसिकता ओळखून पालकांना आपल्या शैक्षणिक जबाबदारीची जाणीव करून देणारे हे पुस्तक पालकांबरोबरच शिक्षक व शिक्षणतज्ज्ञांनाही उपयोगी आहे. ...Read more