आय कॅन सी यू : आभासी जगाची किमया. उत्कृष्ट रोमँटिक थ्रिलरसाठी मूळ लेखिका करेन रोझ यांनी चांगला नावलौकिक मिळवला आहे. त्याला कुठेही अनुवादकाने तडा पडू दिलेला नाही. सध्याचे युग म्हणजे आभासी दुनियेचे युग. या युगात, नवनवीन संशोधनांद्वारे जशी प्रचड क्रांती होत आहे, तशीच - किंबहुना त्यापेक्षा जास्तच क्रांती कल्पना जगातही होत आहे. कल्पनेतली ही क्रांती, अत्यंत गरजेची आहे. कारण त्यामुळे कुठेतरी, आणखीन नवीन शोधांची ठिणगी पडणार आहे. नवीन बीजे रुजणार आहेत. (जी अनेक वर्षांनी वृक्षांत रूपांतरित होताना दिसणार आहेत) ही बीजे काल्पनिक असूनसुद्धा अत्यंत सशक्त आहेत. ती नीट रुजण्याकरता, सत्य अनुभवांच्या खताची सुपीक माती वापरली गेली आहे. गुप्तहेर खात्यातील महत्त्वाच्या अधिकाऱ्यांच्या कहाण्यांची जोड त्याला दिली गेली आहे. खुन्यांचा शोध घेणाऱ्या स्क्वॅडच्या कामगिऱ्या मदतीला घेतल्या आहे. व एक अफलातून कादंबरी उभी झाली, `आय कॅन सी यू`. मुळात करन रोझ या लेखकाद्वारे इंग्रजीत लिहिल्या गेलेल्या, कादंबरीचा उत्कृष्ट असा अनुवाद पराग पोतदार यांनी `मेहता पब्लिशिंग हाउस` करता केलेला आहे. उत्कृष्ट पुस्तकांचा अनुवाद करून घेऊन तो प्रकाशित करण्याबाबत, मेहता पब्लिशिंगने खूप मोठा पल्ला गाठलाय. त्यातीलच हा एक मानाचा तुरा म्हणता येईल. अत्यंत वेगवान कथा, अनेक भयचकित करणारी वळणे- घटना- हाडे गोठवणारे प्रसंग व धडधड वाढवत नेणारी दाट रहस्ये... असे एकंदरीत या कादंबरीचे स्वरूप आहे. त्यातील दोघांमधल्या एका जटिल प्रेमकथेला, खुनांच्या मालिकेची पार्श्वभूमी लाभली आहे. नंतर नंतर खुनी, पुढे कोणाचा खून होणार याचे गुप्त संकेत देणे सुरू करतो. ते लक्षात आल्याबरोबर त्या व्यक्तीला वाचवण्याकरता, सर्व यंत्रणेची जी प्रचंड धावपळ, घबराट, आकांत होतो त्यात वाचक हरवत हरवत जातो. अनेकदा नकळत श्वासही रोधला जातो. जेव्हा सुटतो तेव्हाच लक्षात येते की रोधला गेला होता म्हणून. हीच रहस्यमय कादंबरीच्या यशाची पावती म्हणता येईल ना! कादंबरीची नायक `नोआह` व नायिका `इव्ह` यांची ही अत्यंत जटिल प्रेमकथा आहे. इंटरनेटवर चालणाऱ्या `गेम्स` या कथानकाच्या आधार आहेत. जेव्हा लोक आपल्या गरजा नीट पद्धतीने भागवू शकत नाहीत तेव्हा ते अशा आभासी दुनियेचा आधार घेत जगू पाहतात. त्यापैकी एक गेम असतो, `शॅडोलॅण्ड`. तो एखाद्या साध्या खेळापेक्षाही पुष्कळ वेगळा आणि थोडा अधिक व्याप्ती असणारा. ती एक कम्युनिटी असते. तिथे तुम्ही लोकांना भेटू शकता, तिथे काम करू शकता. काहीतरी मालमत्ता खरेदी करू शकता. पण हे सारे तुमच्या खऱ्या नावाची गुप्तता राखून ठेवत. त्या आभासी जगात तुम्हाला कसे दिसायला आवडेल, तो `अवतार` घेता येत असतो. तिथे अनेक `अवतारांची` विक्रीही होते. सिरियल हुकर, एका पाठोपाठ एक खून करत सुटतो. हे सारे खून आत्महत्या वाटावेत अशा रीतीने केलेले होते. त्याला, ज्यांना अवमानित झालेले, दर्जा हरवलेले व समूहात इज्जत घालवून बसलेले बघायचे त्यांचेच तो खून करत होता. कारण त्यांचे बिल्ले व बंदुका यांच्या जिवावर ते गर्जना करीत. एकूण नियोजित सहा खुनांपैकी तीन खून झाल्यावर, डिटेक्टिव्ह स्क्वॅडच्या लक्षात येते की या आत्महत्या नाहीत, तोपर्यंत त्याची चौथ्या खुनाची तयारी सुरू झालेली असते. शॅडोलॅण्डच्या आभासी दुनियेत त्याला शिकार सापडायची कारण तिथे, माणसे त्यांचे संरक्षक कवच बाजूला सारून खेळायची. वास्तवातील जगात ते करू व बोलू शकणार नाहीत अशा सर्व गोष्टी करत व बोलत. कारण त्यांना खात्री असायची की इथे त्यांना कोणीही ओळखू शकत नाही व हुकरला त्यांचा विश्वास संपादन करणे सोपे जायचे. पण आभासी जगात ऑनलाइन असणाऱ्या लक्षावधी लोकांतून त्याने नेमक्या या सहा जणांचीच निवड का केली याचे उत्तर फक्त आणि फक्त `त्यालाच माहीत होते. लेखकाने वाचकांना रहस्याच्या अनेक गुहांमधून, भयाण दऱ्यांमधून भकास रस्त्यांवरून खुबीने हिंडवले फिरवले आहे. ६०८ पानी ही कादंबरी संपता संपत नाही. परंतु जेव्हा वाचून संपते तेव्हा वाचक प्रचंड प्रमाणात दि:ड्मुढ व अवाक् झालेला असतो. मुळांत इंग्रजी कादंबरी असल्याने नावापासून पुढे सगळेच वाचकाला परके असते. जीवनशैली, हिंसा, सेक्स, पात्रांच्या वागणुकी-सवयी, पार्श्वभूमी, तसेच रहस्य सोडवण्याच्या रीतीदेखील!! तरीही अनुवादात, कादंबरी मस्तपैकी वाचकाला गुंतवून ठेवते. याचे निश्चित श्रेय अनुवादक पराग पोतदारांना जातेय. उत्कृष्ट रोमँटिक थ्रिलरसाठी मूळ लेखिका करेन रोझ यांनी चांगला नावलौकिक मिळवला आहे. त्याला कुठेही अनुवादकाने तडा पडू दिलेला नाही. ...Read more