उत्तम कथासंग्रह... मानवी भावभावनांवर आधारित अनेक कथासंग्रह मराठी साहित्यात उपलब्ध आहेत. यामध्ये बहुतकरून स्त्रीकेंद्री कथांचं प्रमाण जास्त आहे. त्यानंतर नातेसंबंधावरील कथाही आहेत. असाच एक मनाचा वेध घेणारा कथासंग्रह स्नेहल जोशी घेऊन आल्या आहेत. माणसाे मन एखाद्या तळ्यासारखे असते. वरून शांत, स्थिर असणाऱ्या तळ्यात तळाशी का असतं हे फक्त तळचं जाणतं. तसचं मनाचंही असतं. एखादा माणूस वरून कसाही दिसला तरी त्याच्या मनात काय सुरू आहे हे त्याला ठाऊक असतं. मनाचा वेध घेणाऱ्या कथा ‘तळं’ या संग्रहात समाविष्ट केल्या आहेत. या संग्रहातील सर्व कथा कौटुंबिक आशयावरच्या आहेत. माणसाच्या मनात विचारांच्या अनेक लहरी तरंगत असतात. ते उलगडत जाणाऱ्या कथा या संग्रहात आहेत. ‘तिघी’, ‘वाटचाल’, ‘खरं आहे’, ‘मोरपिस’, ‘तळं’ अशा काही कथा माणसाच्या मन:स्थितचा आढावा घेणारे आहेत तर ‘सोबत’ ‘सावट’, ‘संध्याछाया’, ‘प्रवाह’, ‘देस-परदेस’ या कथा वयस्कर लोकांच्या समस्यांबाबत भाष्य करणाऱ्या आहेत. विविध दृष्टिकोनातून मनाची अवस्था मांडलेल्या कथांमुळे ‘तळं’ हा संग्रह वाचनीय झाला आहे. ...Read more

कालच मी आपला ‘तळं’ हा कथासंग्रह वाचला. मला आपला हा कथासंग्रह खूप आवडला म्हणून मुद्दाम आपणांस पत्र पाठवून खास धन्यवाद देवून अभिप्राय कळवित आहे. आपल्या कथासंग्रहातील प्रत्येक कथेची संकल्पना वेगळी आहे, पण आपण कथेची गुंफण इतकी सुंदर करता की, कथा वाचकाच्ा मनाची पकड घेते. आपल्या कथासंग्रहातील सर्वच कथा सुंदर आहेत. त्यापैकी ‘सोबत’, ‘शवविच्छेदन’ या कथा मला आवडल्या तर ‘तळं’ ही कथा मला विशेष भावली. ‘तळं’ या कथेत आपण ज्या तळ्याकडे आपले दुर्लक्ष असते अशा तळ्याला आपल्या विचारांनी महत्त्व प्राप्त करून दिले आहे. ही कथा वाचताना मन एकदम प्रसन्न होते व कथेचा शेवट होताना मन खूपच भावनिक होते. यावरून आपल्या लेखनात केवढी मोठी ताकद आहे हे दिसून येते. याबद्दल आपले विशेष कौतुक वाटते. आपल्या कथासंग्रहाचा माझ्या मनावर एवढा प्रभाव पडला की, मला आपणांस अभिप्राय कळविल्याशिवाय चैन पडेना म्हणून पत्र लेखन केले. आपले पुस्तक मी घरी ठेवणार आहे व मित्रमंडळींना भेट म्हणूनही देणार आहे. आपण असा कथासंग्रह लिहिल्याबद्दल हार्दिक अभिनंदन व पुढील लेखनासाठी हार्दिक शुभेच्छा! आपले यापुढेही उत्तम साहित्य वाचकांना वाचण्यास मिळावे, ही परमेश्वराकडे प्रार्थना! आपला स्नेहांकित -मोहन पुजारी ...Read more