मेरी कॉरेली ही इंग्लिश कादंबरीकार आणि गूढवादी म्हणून ओळखली जाते. मेरी मॅके हे तिचं खरं नाव होतं; पण तिने तिच्या कारकिर्दीची सुरुवात संगीतकार म्हणून केली आणि त्यासाठी तिने मेरी कॉरेली हे नाव धारण केलं. काही कारणाने ती लेखनाकडे वळली. तिची पहिली कादंबरी ‘अ रोमान्स ऑफ टू वल्र्ड्स’ १८८६मध्ये प्रकाशित झाली. या कादंबरीपासूनच ती ‘बेस्ट सेलर’ लेखिका ठरली. तिच्या या साहित्यिक यशाचा आनंद ती पहिल्या महायुद्धापर्यंत अनुभवत होती. एच. जी. वेल्स, रुडीयार्ड किपलिंग यांसारख्या प्रसिद्ध लेखकांच्या साहित्यकृतींपेक्षा मेरीच्या साहित्यकृती जास्त विकल्या जात होत्या. खिस्ती धर्माची पुनर्जन्माशी, खगोलशास्त्राशी, गूढवादाशी सांगड घालण्याचा प्रयत्न ही तिच्या पुस्तकांची मध्यवर्ती कल्पना होती. तिची पुस्तकं आजच्या नवीन युगधर्माच्या पायाचा एक भाग म्हणता येतील. पंचवीस कादंबऱ्यां, चार लघुकथासंग्रह, तीन ललितेतर पुस्तकं इ. साहित्यसंपदा तिच्या नावावर आहे. तिच्या नऊ कादंबऱ्यांवर चित्रपट निर्माण केले गेले. तसेच दोन कादंबऱ्यांचं नाटकात रूपांतर करण्यात आलं.