उर्वशी बुटालिया यांचा जन्म हरियाणामध्ये अंबाला इथे झाला. त्यांनी दिल्ली युनिव्हर्सिटीची एम.ए. (साहित्य) ही पदवी संपादन केली आहे आणि लंडन युनिव्हर्सिटीतून साऊथ एशियन स्टडीजची पदव्युत्तर पदवी प्राप्त केली आहे. दिल्लीतील ऑक्सफर्ड युनिव्हर्सिटी प्रेसमधून त्यांच्या कारकिर्दीला सुरुवात झाली. लंडनस्थित ‘झेडबुक्स’साठी संपादक म्हणून त्यांनी काम केलं. दिल्ली युनिव्हर्सिटीमध्ये त्यांनी रीडर या पदावर काम केले आहे.रितू मेनन यांच्याबरोबर त्यांनी ‘काली’ या खास स्त्रियांसाठीच्या प्रकाशनाची स्थापना केली. या प्रकाशनाच्या माध्यमातून त्यांनी स्त्रियांना आवाज दिला. लेखिकांना व्यासपीठ उपलब्ध करून दिले. फाळणी आणि त्यासंबंधीचा मौखिक इतिहास याचा स्त्रीवादी आणि डाव्या विचारसरणीच्या अंगाने विचार, हे त्यांचं अभ्यासाचं मुख्य क्षेत्र आहे. त्यांनी लिंगभेद, साम्यवाद, मूलतत्त्ववाद आणि प्रसारमाध्यमं या विषयांवर अनेक वृत्तपत्रांतून आणि मासिकांतून लेखन केलं आहे. ‘द गार्डियन’, ‘न्यू इंटरनॅशनॅलिस्ट’, ‘द स्टेट्समन’, ‘द टाइम्स ऑफ इंडिया’, ‘आऊटलूक’ आणि ‘इंडिया टुडे’ ही त्या संदर्भातील काही नावे. ‘तेहेलका’ आणि ‘बीटुबी’साठी त्यांनी नियमित स्तंभलेखन केलं आहे. उर्वशी बुटाला आणि रितू मेनन यांनी ‘इन आदर वर्ड्स’, ‘मेकिंग अ डिफरन्स’ ही पुस्तके संपादित केली. तनिका सरकार यांच्याबरोबर त्यांनी ‘विमेन अँड द हिंदू राइट’ या निबंधांच्या संकलनाचं आणि ‘विमेन अँड राइट विंग मुव्हमेंट्स’ ही पुस्तकं संपादित केली आहेत. ‘स्पिकिंग पीस’ आणि ‘इनर लाईन’ ही त्यांची स्वतंत्र पुस्तकं आहेत. उर्वशी बुटाला आणि रितू मेनन यांना पद्मश्री पुरस्काराने संयुक्तरीत्या गौरवण्यात आलं आहे.