NA

भोमे यांनी सकाळ, तरुण भारत यांसारख्या मराठी, तसेच इतर प्रमुख इंग्रजी वृत्तपत्रांमध्ये विविध विषयांवर स्तंभलेखन, तसेच पत्रलेखन केले आहे. आजवर त्यांचे इंग्रजी व मराठी मिळून १००० पेक्षा जास्त लेख प्रसिद्ध झाले आहेत. त्यांचे शालेय शिक्षण पुण्यातील भारत हायस्कूल मधून झाले, तर बी.एम.सी.सी. कॉलेजमधून त्यांनी महाविद्यालयीन शिक्षण पूर्ण केले. ते सन १९७०मध्ये बी.कॉम.च्या परीक्षेत पुणे विद्यापीठामध्ये सहाव्या क्रमांकाने उत्तीर्ण झाले. या यशाबद्दल त्यांना पुढील शिक्षणासाठी नॅशनल स्कॉलरशिपही मिळाली, परंतु कौटुंबिक जबाबदाऱ्यामुळे त्यांनी १९७०मध्ये बँक ऑफ इंडियामध्ये नोकरी करण्यास सुरुवात केली. त्यांनी २००० साली स्वेच्छानिवृत्ती घेतली. या तीस वर्षांच्या काळात त्यांनी बँकेची विविध पदे व जबाबदाऱ्या यशस्वीरीत्या सांभाळल्या. बालसंगोपनाबद्दल पालकांना मार्गदर्शन करण्यासाठी ते तुम्ही अन् तुमची मुले या विषयावर विविध शाळांमधून मोफत व्याख्याने देतात. त्यांचे सुसंवाद सहकार्याशी हे पुस्तक प्रसिद्ध असून त्यात व्यंगचित्रांच्या साहय्याने मॅनेजमेंट अँड ह्यूमन रिलेशन हा अवघड व गुंतागुंतीचा विषय सोप्या पद्धतीने विशद करण्यात आला आहे. त्यांनी जगप्रसिद्ध व्यंगचित्रकार आर.के. लक्ष्मण यांच्या यू सेड इट! या कॉमन मॅनच्या व्यंगचित्रसंग्रहाचेही भाषांतर केले आहे. व्यवस्थापन, अकाउंट्स, बँकिंग अँड फायनान्स यांसारख्या विषयांवर व्याख्याने देण्यासाठी त्यांना बँकांची ट्रेनिंग कॉलेजेस व विविध मॅनेजमेंट इन्स्टिट्यूट्समधून आमंत्रित केले जाते. २००६ सालापासून ते विडंबन गीतांचा कार्यक्रमही सादर करत आहेत.