- कानिकनाथ बि. भडके
सचिन सर तुमचे पुस्तक जे प्रकाशित झाले , ते तुमच्या जिवनाचा पहिला टप्पाच म्हणला पाहिजे अन् ...हाे तिच खरी जिवनातली खरी कलाटनी हाेय अस मला वाटत ...ऊजळलेला दिवस आपण डाेळ्याने-डाेळा भरून पाहताेय पण ताेच दिवस मात्र परत येत नसताे.. एवढ माञ नक्किच!!
सर तुम्हच्या नविन प्रराशित झालेल्या लेकराला...हाच माझा मार्ग या गाेडंस पुस्तताला खुप-खुप शुभेच्छा...!!
- Smita Deshpande
सचिन पिळगावकर यांचे हे आत्मकथन. फिल्म इंडस्ट्री मधील `मोठे` नाव. शब्दांकन अभिजीत पेंढारकर यांचे. मेहता पब्लिशिंग हाऊस चे प्रकाशन.
३१२ पानाचे हे जाडजूड पुस्तक. परंतु अर्ध्याहून अधिक पानांवर छायाचित्र आहेत.
सचिन चे `शिष्य`, चाहते, ज्यांना सचिन ने सर्वप्रथम ब्रेक दिला ते प्रसिद्ध गायक सोनू निगम यांची `मेरे सचिन भैय्या` म्हणुन याला प्रस्तावना आहे. १९६३ साली वयाच्या अवघ्या साडे चार वर्षाच्या सचिन ने बालकलाकार म्हणुन काम केले अणि त्या नंतर करतच राहिले. ५० वर्षाहून अधिक काळ ते या इंडस्ट्री मध्ये वेगवेगळया भूमिकेत आहेत.
या पुस्तकातील कथन एकूण ७० भागात आहे. त्याला सीन १,सीन२.. असे नम्बर आहेत. सीन १ म्हणजे माझी नाट्यमय `एंट्री` पासून सीन ७० मध्ये `कृतज्ञ` हा अंतिम सीन आहे. हे आत्मकथन असले तरी यातील सगळी पात्रे आपल्या परिचयाची आहे. सचिन येवढेच या इंडस्ट्री विषयी वाचायला आपल्याला नेहमीच आवडते. बहुतेक सगळी पात्र फिल्म इंडस्ट्री शी जुळलेली आहेत. मराठी पेक्षा अधिक काम त्यांनी हिंदी मध्ये केले आहे.
सचिन ने `राज कपूर` व्हावे असे त्यांचे वडील शरद पिळगावकर यांना वाटायचे. त्या करता तसे बाळकडू त्यांच्या वडीलांनी त्यांना दिले. इंडस्ट्रीची ओळख करून दिली.
हे आत्मकथन वाचताना आपल्या आवडते हीरो, हीरोइन, दिग्दर्शक, कॅमेरामन 📹, मेकअप आर्टिस्ट, संगीतकार, गायक, तंत्रज्ञान, याबद्दल अनेक किस्से वाचायला मिळतात. त्या सर्वांचे सचिन जी सोबत असणारे भावनिक, प्रोफेशनल संबंध, त्या निमित्ताने घडलेल्या गमती जमती तर काही कटू अनुभव यात आहेत. मीना आप्पा (मीना कुमारी), युसूफ भाई (दिलीप कुमार), हरी भाई (संजीव कुमार), अमित जी, दादा मुनि (अशोक कुमार) या व अनेक कलाकारांसोबत ऋषीदा, पंचम दा, किशोर दा, आशा ताई, दीदी, सुलोचना बाई, महेश कोठारे, अशोक सराफ - निवेदिता, लक्षा, माधुरी, नवीन जुन्या हीरो, हिरोइन सार्यांची उजळणी त्या निमित्ताने होते. सचिन - सारिका /सचिन - रंजीता या त्या काळी गाजलेल्या जोड्या. सचिन ची जोडी खूप hit झाली ती त्यांची `नवरी` सुप्रिया सोबत. या जोडी चा `सुखाचा संसार` film industry मध्ये आदराने उल्लेखला जातो. त्यांची `एकुलती एक` श्रीया हिच्यावर अर्थातच स्वतंत्र `सीन` आहे.
बालकलाकार म्हणुन सुरवात करून अभिनेता(पारध - १९७७), दिग्दर्शक (मायबाप - १९८२), लेखक (माझा पती करोडपती - १९८८), निर्माता ( आयत्या घरात नागोबा - १९९१), गायक अशा विविध क्षेत्रात त्यांचे योगदान आहे. त्या सर्वांचा उल्लेख या पुस्तकात आहे.
४२ मराठी सिनेमे, ३ मराठी नाटके( अपराध मीच केला, म्हैस येता माझ्या घरा, शिकार) , हिंदी, गुजराती, इंग्रजी एकूण ८९ चित्रपट, TV मालिका, Reality Shows, Host, सचिनमय एल्बम अशा अनेक बाबीत त्यांचे अमूल्य योगदान आहे.
नच बलिऐं - सीजन १ चे विजेता म्हणुन त्यांची व सुप्रिया ची जोडी सर्वांच्या नेहमी लक्षात राहील. ५० वर्षाहून अधिक काळ इंडस्ट्री मध्ये काम केल्यावर Star या Rockstar या reality show मध्ये गायक म्हणून सहभाग घेणे कौतुकास्पद आहे. त्यांचे होम प्रॉडक्शन `सुश्रिया आर्ट्स` ची
`तू तू मैं मैं` ही अतिशय गाजलेली रिमा अणि सुप्रिया ची मालिका ने त्यांना आर्थिक स्थैर्य दिले आहे. याची काबुली ते स्वतः देतात. १९९५ मध्ये परत एकदा मी Income Tax भरण्याच्या टप्प्या पर्यंत गेलो असे ते म्हणतात.
Sachin, you are an Asset to Film Industry अशी ऋषीदां कडून त्यांना मिळालेली शाबासकी बरेच काही बोलून जाते.
महागुरु ही स्वतःला एका अर्थी त्यांनी दिलेली पदवी हा प्रवास वाचता योग्य वाटते.
सचिन महाराष्ट्रचे शान नक्कीच आहे. त्यांचा दांडगा उत्साह, सतत शिकण्याची धडपड, कलेला वाहिलेले, नवीन काही देण्याचे सतत प्रयत्न करणारे सचिन पिळगावकर महाराष्ट्रचे भूषण नक्कीच आहे. `हाच माझा मार्ग` योग्य शीर्षक आहे.
हा चॉकलेट हीरो नेहमीच आवडीचा होता अणि राहील. चित्रपट प्रेमींनी हे आत्मकथन नक्की वाचावे.
त्यांच्या पुढील वाटचाली करता शुभेच्छा 💐
- अमेय पाटकर
सचिनचे (सॉरी पण मित्रासारखा वाटतोस) आत्मकथन प्रकाशित झाल्यावर दोन दिवसातच संपूर्ण वाचून काढले. काही माणसांना ते जन्माला आल्यावर कळालेलं असतं की, आपल्याला काय कराचे आहे ते. त्यासाठी लागणाऱ्या मार्गदर्शनाची संधी ती व्यक्ती शोधत असते. प्रत्येक व्यक्तीकडून स्वत:च्या विकासासाठी लागणारे गुण शोधून स्वत:चा विकास कसा करावा याचे उत्तम उदाहरण म्हणजे हे आत्मकथन. सांस्कृतिक क्षेत्रात काम करू इच्छिणाऱ्या व करणाऱ्या नवोदित कलाकारांसाठी व त्यांच्या परिवारालाही हे फार मार्गदर्शक ठरेल. या क्षेत्रात वावरणाऱ्या ज्येष्ठ साहाय्यक सह तसेच वयाने लहान असणाऱ्या कलाकारांशी कसे वागावे, नम्रता, कल्पकता, गुणग्राहकता, आत्मविश्वास, संयम, सतत्योद्योग, कौतुक, विनोद इत्यादी सचिनच्या व्यक्तिमत्त्वाचे अनेक पैलू अभ्यासण्यासारखे आहेत. या प्रचंड धावपळीतही प्रपंच उत्तम कसा करावा हे ही कळते. थोडक्यात काय तर पूर्ण स. चिन्मय (सचिनमय) असणारे हे आत्मकथन सचिनच्या मनाचा आरसा आहे. सर्वांनी जरूर वाचावे. आम्ही तुझे ऋणी आहोत.
- DAINIK LOKSATTA LOKRANG 14-9-2014
सचिन पिळगावकर या सुप्रसिद्ध अभिनेता आणि दिग्दर्शकाच्या पन्नास वर्षांतील कामगिरीचा हा आलेखपट. सचिन यांनी त्यांच्या १९६३ मधील ‘हा माझा मार्ग एकला’ या पहिल्या चित्रपटापासून ते २०१३ मधील ‘एकुलती एक’ यादरम्यानचा चित्रपटसृष्टीतील पन्नास वर्षांचा प्रवास एकंदर ६९ प्रकरणांत उलगडला आहे. बालकलाकार सचिन, अभिनेता, दिग्दर्शक, पटकथाकार, नृत्यदिग्दर्शक, संकलक, निर्माता, गायक, संगीत दिग्दर्शक, नर्तक, कॅमेरामन, हिंदी चित्रपट लेखक, टीव्ही मालिका आणि रिअॅलिटी शो निर्माता, परीक्षक, निवेदक, उर्दू शायर असा अनेक मार्गांनी संपन्न झालेला त्यांचा प्रवास यात दिसतो. याहीपुढे जाऊन एक यशस्वी कुटुंबप्रमुख, गाजावाजा न करता नवोदितांच्या मदतीला धावून जाणारे, माणसे जोडणारे आणि नाती मानणारे तसेच निभावणारे सचिन पिळगावकर माणूस म्हणून यात भावतात.
उत्तम निरीक्षणशक्ती, दांडगी स्मरणशक्ती, हजरजबाबीपणा, संयमी, दिलदार अशी उद्यमी व्यक्ती या आत्मचरित्रातून आपल्यासमोर साकार होते. पन्नाशीनंतरही विद्यार्थीभावना अंगी बाळगून आजही नवनवे प्रयोग करण्यास सरसावणारा हा कलाकार समजण्यास त्यातून मदत होते, हा या पुस्तकाचा विशेष.
पुस्तकाची भाषा विलक्षण संवादी आहे. ही पन्नास वर्षे जशी सचिन यांची होती, तशीच हिंदी-मराठी चित्रपटसृष्टीचीही होती. मात्र, त्यावरील अपेक्षित भाष्य यात आलेले नाही. सचिन यांच्याकडे सांगण्यासारखे खूप काही आहे. त्यातील केवळ हिमनगाचे टोक म्हणावे इतकीच माहिती या चरित्रात आली आहे असे जाणवते. हे चरित्र जसे किश्श्यांमधून तसेच पानोपानी दिलेल्या तब्बल १०८ पूरक छायाचित्रांतूनही उलगडत जाते.
- DAINIK SAKAL SAPTRANG 9-2-2014
वयाच्या पन्नाशीनंतर एका डान्स शोमध्ये नृत्य करण्यासाठी दाखल झालेला कलाकार. समवेत अभिनेत्री पत्नी. आपलं कर्तृत्व त्यांनी याआधी सिद्ध केलेलं. ज्या चॅनेलच्या वतीनं ही स्पर्धा आयोजित केलेली त्यांच्याकडून झालेला दुजाभाव, चॅनेलच्या वरिष्ठ मंडळीचं त्रासदायक वर्तन आणि काही हितसंबंधी मंडळींनी (एके काळचा मित्र आणि त्याची मुलगी) केलेलं खालच्या पातळीवरचं कारस्थान. कोरिओग्राफर नवीन. सगळं काही प्रतिकूल. पण या जोडप्यानं अक्षरश: कमाल केली आणि पन्नास लाखांचं पहिलं बक्षीस मिळवलं आणि देशभरात हंगामा केला. एखाद्या चित्रपटात शोभावी अशीच ही कहाणी. प्रत्यक्ष आयुष्यात ही घडली अर्थातच प्रसिद्ध अभिनेता सचिन पिळगावकर यांच्या बाबतीत. सचिनच्या या साऱ्या थरारक आणि कसोटी पाहायला लावणाऱ्या प्रकरणाबद्दल आणि त्या स्पर्धेतील राजकारणाबद्दल त्याच्या ‘हाच माझा मार्ग...’ या आत्मकथनातून संपूर्ण माहिती मिळते.
मराठीत अभिनेते आणि अभिनेत्रींची आत्मकथनं बरीच आहेत. त्यातील हंसा वाडकर यांचं आत्मकथन गाजलं होतं. तसेच सूर्यकांत आणि चंद्रकांत या अभिनेत्या बंधूंचे, तसेच श्रीराम लागू यांचं आत्मकथन गाजलं होतं. दादा कोंडके यांच्या आत्मचरित्रानं तर खूपच लोकप्रियता मिळवली होती. दुर्गा खोटे, उषा किरण, सीमा देव, जयश्री गडकर आणि अन्य काही अभिनेत्रींची आत्मकथनं गाजली. दिग्दर्शक, निर्माते, संगीतकार आणि कॅमेरामन या मंडळींनीही आपले अनुभव लिहिले. रुपेरी पडद्यामागचा अंधार आणि या मंडळींचे तेथील झगमगाटामागचे कष्ट या कथनातून उलगडत गेले. पण अनेक वाचकांना या आत्मकथनातून वेगळं काही वाचायला हवं असतं. फिल्मी मॅगेझीनमधून छापून आलेल्या गॉसिपची त्यांना ओढ असते आणि त्यासारखीच चटपटीत आणि खमंग माहिती मिळेल अशी अपेक्षा ते बाळगत असतात. याबाबतीत मात्र आतापर्यंतच्या आत्मकथनांनी अशा वाचकांची निराशा (?) केली आहे. मराठीतील ही आत्मचरित्रं गंभीरता आणि आशयाशी आपलं नातं टिकवून होती. अभिनेता म्हणून ५० वर्ष पूर्ण केलेल्या सचिन यांचं आत्मकथनही कोणत्या गॉसिपला थारा न देता मोलाची माहिती देतं. आत्मकथनाच्या शेवटी सचिन यांनी आपल्या कारकिर्दीतील चित्रपट आणि मालिका, तसेच आपल्या अन्य कामासंबंधी सविस्तर यादी दिली आहे. ती महत्वाची तर आहेच; पण ज्यांना सचिनची कारकीर्द अभ्यासायची आहे त्यांच्यासाठी तर ती मौल्यवान आहे. ‘हा माझा मार्ग एकला’ हा सचिनचा पहिला चित्रपट मानला जातो. पण त्याआधी त्याची भूमिका असलेला ‘बायको माहेरी जाते’ हा चित्रपट प्रदर्शित झालेला होता. अर्थात अशा अनेक गोष्टी या आत्मकथनामुळं प्रथमच माहिती होतील.
आपल्या पन्नास वर्षांच्या कारकिर्दीत सचिननं हिंदी आणि मराठी चित्रपटसृष्टीतील दिग्गज मंडळींबरोबर काम केलं आहे. सचिन उर्दू भाषा आणि उच्चार शिकला थेट मीनाकुमारी यांच्यासारख्या ज्येष्ठ अभिनेत्रीकडून. अक्षरश: एखाद्या मुलाची शिकवणी घ्यावी तशी मीना कुमारी यांनी सचिनची शिकवणी घेतली. या शिकवणीच्या काळात सुरवातीला कंटाळा करणाऱ्या सचिननं नंतर ही भाषा आणि उच्चार इतक्या चांगल्या पद्धतीनं आत्मसात केले, की मजरुह सुलतानपुरी आणि कादरखान यांच्यासारख्या मंडळींचा स्नेह त्यानं त्या जोरावर मिळवला आणि जावेद अख्तर यांच्याकडून प्रशंसाही मिळवली. सचिनला बक्षीस म्हणून एक नज्म लिहून देणारे सुलतानपुरी आणि प्रेरणा या शब्दाला योग्य उर्दू शब्द सुचवल्याबद्दल कादरखान यांनी त्याची स्तुती करणं आणि आदल्या दिवशीच्या प्रसंगाबद्दल खुलेपणानं सॉरी म्हणणं हे सारंच मुळातून वाचण्यासारखं आहे.
हिंदी चित्रपटसृष्टीतील देव आनंद आणि विजय आनंद यांच्यासारख्या दिग्दर्शकांकडून सचिनला खूप काही शिकायला मिळालं; तर ‘बैराग’ च्या निमित्तानं दिलीपकुमार यांच्या मार्गदर्शनाचा लाभ मिळाला. गॉगल का घालायचा नाही, हे मोजक्या शब्दात त्यांनी त्याला सांगितलं. असे एक ना दोन अनेक किस्से या पुस्तकात सचिन यांनी कथन केलेत. वैयक्तिक आयुष्य आणि चित्रपट क्षेत्रातील आपल्या वाटचालीबद्दल लिहिताना सारिका बरोबरच्या प्रेम प्रकरणाची माहिती अत्यंत संयमानं आणि तिचा आदर राखून दिली आहे. सारिकाच्या वडिलांची आणि तिची भेट घालून देण्यासाठी त्यांनी केलेले प्रयत्न कुणालाही आवडून जावेत असे आहेत.
संजीवकुमार यांच्याबरोबरचा त्याचा स्नेह इतका घट्ट होता आणि त्यांनी त्याला कसं मार्गदर्शन केलं ते कळतं. पण ‘त्रिशूल’ मधील ते आणि सचिन यांच्यावर चित्रित झालेला एक खूप उत्तम प्रसंग कसा कापला गेला हे जितक्या सहजतेनं सचिन सांगतो त्याच सहजतेनं त्यानं गळ घालूनही संजीवकुमार यांनी त्याच्यासाठी वृद्धाची भूमिका करायला नकार दिला आणि त्यानंतर शत्रुघ्न सिन्हा यांच्या वडिलांची भूमिका कशी स्वीकारली तेही सांगतो. संजीवकुमार यांचा कुठेही अपमान होणार नाही या पद्धतीनं त्यानं हे सगळं सांगितलं आहे. अमिताभ बच्चन यांच्याबरोबर त्यानं दोन-तीन चित्रपटात काम केलं. त्या वेळचा किस्सा अमिताभ यांच्या मोठेपणाची आणि सचिनच्या धाडसाची साक्ष देणारा आहे. अमिताभ यांच्याबरोबरच्या संबंधात एका मालिकेतील एका एपिसोडनं कसा गैरसमज झाला आणि तो त्यानं स्वत: जाऊन कसा दूर केला ते कळतं; त्याचबरोबर चूक नसताना कसा मनस्ताप होतो तेही वाचकाला कळतं. हिंदी चित्रपटसृष्टीत छोट्या छोट्या गोष्टींनी कसे गैरसमज होऊ शकतात याचा प्रत्यय या आणखी एका प्रसंगावरून येतो. एका नियतकालिकाला दिलेल्या मुलाखतीत संजीवकुमार यांच्याबद्दल सचिन यानी एक वक्तव्य केलं होतं. त्याबद्दल संजीवकुमार यांचे काहींनी कान भरले होते. पण सचिन यांनी त्यांची स्वत: भेट घेऊन या संदर्भात खुलासा केला आणि मग संजीवकुमार यांचा राग कसा निवळला ते कळतं.
सचिन यांच्या आयुष्यातील महत्वाचा चित्रपट ‘अष्टविनायक’ बद्दलची माहिती वाचताना योगायोगाची गंमत वाटते. या चित्रपटात सचिनची भूमिका नास्तिक माणसाची आणि नायिका वंदना पंडित यांची भूमिका आस्तिक अशी होती. प्रत्यक्ष जीवनात बरोबर उलटं होतं. वंदना अगदी नास्तिक आणि सचिन आस्तिक आहेत. आपल्या आयुष्यात वडिलांच्या आणि मित्र अविनाश ठाकूर याच्या निधनाचा आघात झाल्यावर सचिन यांची झालेली अवस्था वाचकाला अस्वस्थ करते. अभिजित पेंढारकर यांनी हे शब्दांकन समजून केलं आहे. संपूर्ण पुस्तकातून सचिन यांनी दिग्गज मंडळींकडून विविध बाबतींतील शिक्षण कसं घेतलं ते कळतं. आयुष्यभर विद्यार्थी राहून चित्रपटसृष्टीतील सर्व विभागातील कामं शिकून घेणाऱ्या सचिन यांचा मार्ग यशाचा का झाला ते कळतं.
- DAINIK LOKSATTA VRUTANT20-12-2013
‘हा माझा मार्ग एकला’ या चित्रपटाद्वारे वयाच्या अवघ्या पाचव्या वर्षी चंदेरी दुनियेतील झालेला प्रवेश...याच चित्रपटासाठी मिळालेला राष्ट्रीय पुरस्कार व त्यानंतर मराठी-हिंदी चित्रपटसृष्टीमध्ये झालेली यशस्वी वाटचाल आठवणींच्या रुपाने समोर आली अन् अभिनेते सचिन पिळगांवकर यांचा चंदेरी दुनियेतील प्रवास रसिकांसमोर उलगडत गेला...
चित्रपट सृष्टीतील सचिन पिळगांवकर यांची वाटचाल मांडणाऱ्या ‘हा माझा मार्ग’ हे आत्मनिवेदनरूपी पुस्तक मेहता पब्लिशिंग हाउसने प्रकाशित केले. या निमित्ताने सचिन यांची मुलाखतकार सुधीर गाडगीळ यांनी मुलाखत घेतली. त्यात सचिन यांच्याशी झालेल्या गप्पांमधून त्यांचा चंदेरी दुनियेतील प्रवास उलगडला. जोडीला त्यांच्या चित्रपटातील गाणी व शेरोशायरीनेही रंगत आणली. प्रकाशक सुनील मेहता या वेळी उपस्थित होते. अभिनयासाठी पंडित नेहरूंनी केलेले कौतुक, ‘शोले’ चित्रपटात अमिताभ बच्चन यांच्यासोबत काम करताना आलेला अनुभवही त्यांनी सांगितला. ‘हा माझा मार्ग एकला’ या चित्रपटासाठी राजा परांजपे यांनी माझी निवड केली, तेव्हा चित्रपटसृष्टीत काम करण्याचे ठरविले नव्हते, असे सांगून सचिन म्हणाले, की पंडित नेहरूंच्या हस्ते राष्ट्रीय पुरस्कार मिळाल्यानंतर माझ्या आईने चित्रपटसृष्टीत काम करण्याचा माझा मार्ग ठरविला. त्यानंतर मोठमोठ्या लोकांच्या सहवासात शिकत गेलो. प्रत्येक नातं व कामामध्ये स्वत:ला झोकून दिले, तरच प्रेम व आदर मिळतो. त्यामुळे मी पन्नास वर्षे टिकून आहे. आजही मी चित्रपट या कलेचा विद्यार्थीच आहे. काळानुसार बदलत गेलो, त्यामुळेच टिकलो. पैशापेक्षा माणसे कमावली पाहिजेत.
‘मनसे’ शी राजकीयदृष्टया संबंध नाही. महाराष्ट्र नवनिर्माण सेनेच्या चित्रपट सेनेच्या प्राथमिक सदस्यत्वाबद्दल सचिन म्हणाले, की चित्रपटसृष्टीच्या भल्यासाठी एक जेष्ठ कलाकार म्हणून जी संस्था मार्गदर्शन मागते त्यांना मी मार्गदर्शन करतो. त्यानुसार मी शिवसेना चित्रपट सेना, चित्रपट महामंडळ व इम्पाचाही सदस्य आहे. त्यानुसारच मनसेच्या चित्रपट सेनेचे प्राथमिक सदस्यत्व घेतले. या पक्षाशी माझा राजकीयदृष्टया काही संबंध नाही.
- DAINIK GAONKARI 15-9-2014
५० वर्षे उदंड प्रतिसाद देणाऱ्या रसिकांच्या प्रेमाशी मी बांधील आहे. म्हणूनच मी मला जपतो कारण पुढच्या काळातही मला तुमची भरभरुन करमणूक करायची आहे, असे भावपूर्ण उद्गार लोकप्रिय अभिनेता सचिन पिळगावकर यांनी काढले.
ज्योती स्टोअर्स आणि निर्माण ग्रुप यांच्या संयुक्त विद्यमाने आयोजित ‘लेखक तुमच्या भेटीला’ या उपक्रमांतगर्त शंकराचार्य संकुलातील डॉ. कुर्तकोटी सभागृहात काल (दि. १४) अभिनेता सचिन याची मुलाखत सदानंद जोशी यांनी घेतली. प्रारंभी वसंत खैरनार यांनी स्वागत, प्रास्ताविक केले. व्यासपीठावर नगरसेवक दामोदर मानकर, मेहता पब्लिशिंग हाऊसचे संचालक सुनिल मेहता उपस्थित होते. मान्यवरांचे सत्कार ज्योतिराव खैरनार, नेमिचंद पोदार यांच्या हस्ते करण्यात आले. दामोदर मानकर यांनी सचिनला भारत सरकारने ‘पद्मश्री’ किताबाने गौरवावे, अशी नाशिककरांतर्फे अपेक्षा व्यक्त केली.
सदानंद जोशी यांनी घेतलेल्या मुलाखतीतील प्रश्नांना उत्त्तरे देताना सचिन म्हणाले, ५० वर्षांच्या चित्रपटसृष्टीतील कारकिर्दीनंतर ‘हाच माझा मार्ग’ हे पुस्तक प्रकाशित झाले. मेहता पब्लिशिंगचे सुनील मेहता आणि शब्दांकनासाठी अभिजित पेंढारकर यांनी खूप मेहनत घेतली. मी भूतकाळात जगत नाही. वर्तमानकाळात जगत भविष्याचा वेध घेतो. न ठरवता आठवले तसे लिहित गेलो. पुस्तकातील भाषाशैली पूर्णपणे माझीच असून जुन्या आठवणींना नवा ‘लुक’ दिला आहे. पुस्तकाचे मुखपृष्ठ व स्वरुप देखणे आहे. मी तुमच्याशी बोलतो असा ‘फिल’ पुस्तक वाचताना सतत येईल असे सचिनने सांगितले. सचिन पुढे म्हणाला, ‘माझा जन्म गोकुळाष्टमीला झाला. भालजी पेंढारकर आणि दिग्दर्शक माधव शिंदे यांच्या पहिल्या चित्रपटात मला नाकारण्यात आले, पण वर्षभरानंतर ५ वर्षांचा असताना सुधीर फडके निर्मित व राजा परांजपे दिग्दर्शित ‘हा माझा मार्ग एकला’ चित्रपटात पहिली भूमिका केली. तेथून चित्रपटसृष्टी व प्रेक्षकांची करमणूक हाच माझ्या जीवनाचा मार्ग ठरला. दिग्दर्शकाला काय हवे ते मी बरोबर ओळखतो व १०० टक्के देतो, असे सांगून सचिनने संजीवकुमार, अमिताभ बच्चन, जया बच्चन यांच्याबरोबर असणारे ऋणानुबंध व्यक्त केले. मीनाकुमारीने २ वर्षे उर्दू उच्चार शिकवले, मजरुह सुलतानपुरींनी पुत्रवत प्रेम केले असे सचिनने नमूद केले. कलावंताने स्पंजसारखे असावे असे सांगून सचिन म्हणाला, मी कायम कान, डोळे उघडे ठेवून सूक्ष्म निरीक्षण करतो. प्रत्येकाने आजची भाषा, नवे तंत्रज्ञान आत्मसात करावे. ‘नवरी मिळे नवऱ्याला’ या चित्रपटाद्वारे मराठी चित्रपटसृष्टीत ‘शहरी ट्रेंड’ निर्माण केला असे सांगून सुप्रिया याच चित्रपटामुळे अर्धांगिनी म्हणून मिळाली. तिने आहाराच्या सवयी बदलून जीवनात शिस्त आणली. अशोक सराफला मी मोठा भाऊ मानतो. त्यांच्याकडून कॉमेडीचे टायमिंग शिकलो. भाषेचे संस्कारही त्यानेच केले, असे सांगून ‘सांगतो ऐका’ हा सतीश राजवाडे दिग्दर्शित माझा नवा चित्रपट २ ऑक्टोबरला प्रदर्शित होत आहे असे स्पष्ट केले. ‘शोले’ हा चित्रपट पहिले चार आठवडे पडला पण त्यातील अमजदखानच्या आवाजाचे मी पुन्हा डबिंग करण्याचा हटट धरला, त्यानुसार नवे रेकॉर्डिंग झाले व नंतर ‘शोले’ने तुफान यश मिळविल्याची आठवणही’ सचिनने सांगितली.
एका वाक्यात उत्त्तरे देताना राजा परांजपेमुळेच तुमच्यासमोर आता आहे. सोनू निगम हा उत्त्तम गानहिरा आहे. स्वप्निल जोशी हा नकळत झालेला मानसपुत्र तर अली असगर पहिला मुलगा आहे. आई माझे सर्वस्व असून सुप्रिया पार्टनर तर श्रीया जीव आहे आणि ‘पप्पा’ हा परमेश्वराने दिलेला आशीर्वाद आहे, असे सचिनने सांगितले.